Կենտրոնական բանկը չի ստիպի բոլոր լրագրողներին ներողություն խնդրել

Չնայած ոչ աշխատանքային օրվա, Հայաստանի Կենտրոնական բանկը այսօր արտահերթ ասուլիս էր հրավիրել, որի ընթացքում ԿԲ ռազմավարության և ինֆլյացիայի բաժնի ղեկավար Մարգար Դրամփյանը անդրդարձավ Ադրբեջանական մանաթի արժեզրկմանը: Ստորև ներկայացնում ենք ելույթը ամբողջությամբ.

«Հարգելի լրագրողներ, թղթակիցներ և ինչու ոչ` բլոգերներ: Երևի կռահում եք` ինչու եմ այսօր Ձեզ այստեղ հավաքել: Ադրբեջանական մանաթը մեկ գիշերվա ընթացքում արժեզեզրկվել է 33.5%-ով: Պատկերացնու՞մ եք 33.5%-ը ինչ թիվ է: Իհարկե չեմ հրավիրել Ձեզ, որ գլուխ գովենք, բայց մյուս կողմից` 33.5%: Եթե մենք թողնեինք դրամը էդքան արժեզրկվեր, հիմա դոլարը մի 550 դրամ կլիներ, բայց ընդամենը 477 դրամա: Հանկարծ չմտածեք, որ այսօրվա հանդիպման նպատակն է չարախնդալը, կամ նման մի էժանագին բան: Բայց ուզում եմ ձեզ հիշեցնել, թե ինչ լացուկոծ ու ողբ էին կապել մեր լրատվականները, երբ դրամը արժեզրկվեց ընդամենը 15-16%-ով: Հիմա դա համեմատեք Ադրբեջանի 33.5%-ի հետ: Բա արժե՞ր:

Չէի ուզենա մանրանալ, բայց ավելորդ չի հիշեցնել ինչ վիրավորական վերնագրեր էիք գրել այդ օրերին բոլորդ: Առավոտ թերթը չէր ամաչել ու գրել էր «Դարակազմիկ կոլափս Կենտրոնական բանկում», Իրավունք defacto-ն առանց որևէ բան ստուգելու միանգամից հայտարարեց «Ընդդիմությանը, համասեռամոլներին ու մասոններին հաջողվեց ծնկի իջեցնել դրամը», բա՞ iԼուր.am-ի «Ռեժիմը դրամն էլ կործանեց» սյունակը: Հիմա խղճի խայթ գոնե զգու՞մ եք: Ո՞րտեղ է Շամշյան.com-ը իրա «Դրամի արժեզրկումը 12 Opel Vectra-ի ավտովթարի պատճառ», ի՞նչ եղավ BlogNews-ին ու իր «Սոնա Շահգելդյանի 14 ամենասուր ստատուսները Կենտրոնական բանկի մասին» վերնագրին: Ինչու՞ եք հիմա բոլորդ ձայնը կտրել:

Այսօրվա ասուլիսի իմաստը, բնավ երեսով տալը չէ, բայց կարելի է չէ՞ մի հատ համեմատել մեր փոքրիկ արժեզրկումը ադրբեջանական էպիկական 33.5% արժեզրկման հետ: Ակամա մտածում ես, այ հիմա գոնե կարելի է գնահատել, թե ով է ամենահզոր Կենտրոնական բանկը տարածաշրջանում:

Թող հենց հիմա կայծակը ինձ տեղում խփի, եթե սուտ եմ ասում, չէի ցանկանա, որ բոլորդ ներողություն խնդրող, կամ ձեր ակնհայտ սխալները ընդունող հոդվածներ գրեիք: Ոչ, ի սեր Աստծո: Բայց առաջարկում եմ, որ յուրաքանչյուր լրագրող, երբ կտեսնի Կենտրոնական բանկի որևէ աշխատակցի, թող մոտենա և գրկի նրան` ամուր-ամուր գրկի: Եթե ցանկություն լինի ասել «կներես եղբայր», կամ «սխալվել եմ քույրիկ» մի զսպեք այդ ցանկությունը: Սույնով մեկնարկում է «Գրկի՛ր Կենտրոնական բանկի աշխատակցին» համաժողովրդական ակցիան: Այսքանը, շնորհակալություն ուշադրության համար»: