Երեկ տեղի ունեցած կառավարության նիստի ընթացքում նախարարներին հաջողվեց վերջնական տեսքի հասցնել այն ապրանքների ցուցակը, որոնք թանկանալու են կարկուտի պատճառով 2012թ.: «Բացի կարկուտի ավանդական զոհ` գյուղամթերքից, ակնկալվում է, որ 2012թ. ինովացիոն թանկանացումներ կարձանագրվեն նաև այլ ապրանքատեսակների շարքում,» — հայտնեց լրագրողներին վարչապետ Տիգրան Սարգսյանը: Նիստին հաջորդած շնորհանդեսին լրագրողներն էլ կարողացան ծանոթանալ ցուցակի հետ:
Ահա ցուցակում ընդգրկված ապրանքատեսակներից մի քանիսը`
| Ապրանքատեսակ | Թանկացում | Նշումներ |
| Ծիրան | 20% | Բնակչությունը վաղուց պատրաստ է |
| Խնձոր | 30% | Բնակչությունը արդեն պատրաստ է |
| Ձու | 20-30% | Բնակչությունը չի զարմանա |
| Բենզին | 7-9% | Բնակչությունը կարող է գազ դնել |
| Շաքար | 100 դր. | Բնակչությունը պատրաստ չի, բայց Ս.Ա.-ը շատ խնդրեց |
| ԱՊՊԱ | 9% | Մի կերպ կբացատրենք |
Ծիրանի և կարկուտի լարված հարաբերություններից շահեց միմիայն նուռը` ամրապնդելով իր դիրքերը որպես ազգային միրգ: Հայկական խնձորն արդեն իսկ արժեքով գերազանցեց, օրինակ, ֆրանսիական խնձորին: Գնաճի արդյունքում շատ երևանցիներ ստիպված կլինեն ավելի ռադիկալ լուծումներ գտնել օրգանիզմը երկաթով ապահովելու համար, ինչի արդյուքնում կվնասվեն նրանց ատամները: Կարկուտով պայմանավորված հավկիթի գնաճը կմեկնարկի 2011թ. վերջին եռամսյակում: Ըստ նորագույն հետազոտությունների` կարկուտը նվազեցնում է աքլորների լիբիդոն, ինչի արդյունքում կտրուկ նվազում է հավկիթների քանակը:
Շատ ավելի դժվար է բացատրել` ինչու կարկուտի արդյունքում կթանկանա բենզինը, և կառավարության անդամները խոստովանում են, որ դեռ փնտրում են բացատրություն, ավելին` հայտարարել են լավագույն բացատրություն ներկայացնող շարադրությունների մրցույթ: Շաքարի գինը կավելանա ևս 100 դրամով, քանի որ կարկուտի ժամանակ մարդիկ ավելի հաճախ են թեյ խմում և առանձնապես չեն առարկել գնի բոլոր նախորդ բարձրացումներին: ԱՊՊԱ-ն, իր հերթին, կթանկանա կարկուտի ժամանակ կրկնապատկվող տրանսպորտային վթարների արդյունքում:
Դինամիկ փոփոխվող կլիմայի պարագայում հնարավորություն կա, որ հաջորդ տարի կարկուտի տեղումներ կարող են ընդհանրապես չլինել: Սակայն կառավարությունը հատուկ հանձնաժողով է գործուղել Կենտրոնական Ամերիկայի ջունգլիներ, որտեղ, ինտենսիվ դասընթացների արդյունքում փոխնախարարները և վարչությունների պետերը պետք է վարժ տիրապետեն բնիկների «Կարկուտի պարին»: Անկարկուտ եղանակի դեպքում հանձնաժողովը կկատարի պարը Հանրապետության հրապարակում. միջոցառումը արդեն արտոնագրվել է քաղաքապետարանի կողմից:
Կառավարությունը հավատացնում է, որ գնաճի պատճառները օբյեկտիվ են, և խոսք է տալիս չնախատեսված գնաճերի մասին հաղորդել առանձին:
Այս նյութը պատրաստվել է ՎԿԱ ծրագրի շրջանակներում – EBG Disclaimer
կարկուտը նվազեցնում է աքլորների լիբիդոն 😀
բա հաց, ցորենի, կարագի, պանրի վրա կարկուտը չի ազդում??? Ազդումա էն էլ ոնց: մենակ ինտերնետի վրա չի ազդում կարկուտը:
“Կար-կուտը” լավ բան է թե’ աքլորի, թե’ հավի լիբիդոյի համար. այ “Չկար-կուտը-զի կարկուտ էր”-ը…
Բա հըլը վարչապետական մակինտոշի վրայի ֆինանսական ճգնաժամ ապրած խնձորը՝ երկու կողմից կրծած ։)
JJ, ինչ էլ սուր աչք ունես:)